టాటా మోటార్స్ లిమిటెడ్ అనేది ఒక భారతీయ బహుళజాతి వాహన తయారీ సంస్థ. దీని ప్రధాన కార్యాలయం ముంబైలో ఉంది. ఇది టాటా గ్రూప్ లో ఒక భాగం. ఈ కంపెనీ కారు, ట్రక్కు, వ్యాను, బస్సులను ఉత్పత్తి చేస్తుంది. కంపెనీ ప్రముఖ అనుబంధ సంస్థలలో బ్రిటిష్ జాగ్వార్ ల్యాండ్ రోవర్, దక్షిణ కొరియా టాటా డేవూ ఉన్నాయి. టాటా మోటార్స్ హిటాచి, స్టెలాంటిస్ లతో జాయింటు వెంచర్లను కలిగి ఉంది. ఇవి ఫియట్ క్రిస్లర్, టాటా-బ్రాండెడ్ వాహనాలకు వాహన భాగాలను తయారు చేస్తాయి. టాటా మోటార్స్ భారతదేశంలో జంషెడ్‌పూర్, పంత్‌నగరు, లక్నో, సనంద్, ధార్వాడ, పుణే లలో ఆటో తయారీ, వాహన ప్లాంట్లను కలిగి ఉంది. అలాగే అర్జెంటీనా, దక్షిణాఫ్రికా, యునైటెడ్ కింగ్‌డమ్, థాయిలాండ్ లలో కూడా ఉంది. దీనికి భారతదేశంలోని పూణే, జంషెడ్పూడ్, లక్నో, ధార్వాడ, దక్షిణ కొరియా, యునైటెడ్ కింగ్‌డం, స్పెయిన్ లలో పరిశోధన, అభివృద్ధి కేంద్రాలు ఉన్నాయి. టాటా మోటార్స్ బాంబే స్టాక్ ఎక్స్ఛేంజు భారత జాతీయ స్టాక్ ఎక్స్ఛేంజు లలో జాబితా చేయబడింది. బిఎస్‌ఇ సెన్సెక్సు, నిఫ్టీ 50 బెంచ్‌మార్కు సూచికలలో ఒక భాగం. 2019 నాటికి ప్రపంచంలోని అతిపెద్ద కార్పొరేషన్ల ఫార్చ్యూన్ గ్లోబల్ 500 జాబితాలో ఈ కంపెనీ 265వ స్థానంలో ఉంది. Wikipedia